ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានឆ្លើយតបទៅនឹងអ្នករិះគន់ដែលថារដ្ឋាភិបាលកម្ពុជាដូចជាកង្កែបក្នុងអណ្ដូងដែលមិនបានមើលពីការរីកចម្រើនរបស់បរទេស ថាជារឿងដែលមិនចាំបាច់ពីព្រោះថាកម្ពុជាមើលពីខ្លួនឯង និងមានមោទនភាពលើខ្លួនឯងច្រើនជាង។
សម្ដេចទទួលស្គាល់ថា៖ «យើងដូចជាកង្កែបក្នុងអណ្ដូងតែអណ្ដូងរបស់យើងកាន់តែសម្បូរបែប» ដែលមានន័យថាទីក្រុងកាន់តែរីកចម្រើន មានភាពសំបូរសប្បាយ ពលរដ្ឋកាន់តែមានជីវភាពធូរធារដែលទាំងអស់នេះហើយគឺជាមោទនភាពរបស់ជាតិប្រជាជនកម្ពុជា។
សម្ដេចធិបតីលើកឡើងបែបនេះក្នុងពិធីបើកការដ្ឋានសាងសង់ស្ពានអាកាសទី៩ ព្រឹកថ្ងៃទី១៧ ខែមិថុនា។
សម្ដេចបានលើកឡើងថាអ្វីដែលសំខាន់ដើម្បីធានានូវការអភិវឌ្ឍន៍និងរីកចម្រើនរបស់កម្ពុជាគឺការថែរក្សាសន្តិភាពស្ថេរភាពសង្គមឲ្យបាននឹងនរ៕
